Professional boksning superog‘ir vazn toifasida Jahon boks assotsiatsiyasi (WBA) chempioni Lukas Braun doping tekshiruvidan o‘tganida, uning qon namunasida taqiqlangan klenbuterol moddasi borligi aniqlandi. Bu haqda “Olamsport” xabar bermoqda.

Avstraliyalik bokschi o‘zbekistonlik Ruslan Chagayevga qarshi o‘tkazgan jangidan besh kun avval va jang yakunlanganidan so‘ng doping uchun tahlil topshirgandi. Endi Braun chempionlik kamaridan mahrum qilinishi mumkin. Ruslan Chagayev esa yangi chempionlik jangida ishtirok etish imkoniyatiga ega bo‘ladi.

Ma’lumot uchun, klenbuterol moddasi Xalqaro antidoping agentligi (WADA) tomonidan taqiqlangan moddalar qatoriga kiritilgan.

Eslatib o‘tamiz, Ruslan Chagayev va Lukas Braun o‘rtasidagi chempionlik jangi 6-martga o‘tar kechasi, Grozniy shahrida o‘tkazilgandi. Unda o‘zbekistonlik bokschi raqibiga 10-raundda texnik nokaut bilan mag‘lub bo‘lgandi.

Manba: Daryo.Uz