Hozirgi kunda Shimoliy Amerikada o‘ta kuchli sovuq ob-havo hukm surmoqda. Euronews xabariga ko‘ra, sovuqdan hatto dunyodagi eng yirik sharsharalardan biri – Niagara ham muzlab qolyapti.
Mazkur shalola AQShning Nyu-York shtati hamda Kanadaning Ontario provinsiyasi chegarasida joylashgan. Noodatiy qahraton va qor bo‘roni oqibatida u ulkan bir muzlikka aylanib qolgan. Undan oqayotgan suv oqimi sharshara tubiga yetib bormasdan, bahaybat sumalaklar shaklida qotib qolyapti.
Ta’kidlab o‘tish o‘rinliki, Niagara sharsharasi 1848 hamda 1912-yillarda butkul muzlab qolgan.
Sharsharaning muzlashiga sabab bo‘layotgan sovuq AQShda katta muammolarni keltirib chiqarmoqda. "ITAR-TASS”ning 9-yanvardagi xabarida aytilishicha, qahraton sababli AQShda shu kungacha 23 kishi hayotdan ko‘z yumgan. Ularning aksariyati sovuq urishidan, ayrimlari muzlash sababli yuzaga kelgan yo‘l-transport hodisalarida, shuningdek, joylarni qor va muzlardan tozalash jarayonlarida nobud bo‘lishgan.
Manba: Daryo.uz
| 
