uMail.uz xizmati foydalanuvchilari uchun 200 MB xajmga ega pochta qutisi taklif etilmoqda. Pochta spam va viruslardan himoyalangan. Bitta xatning maksimal xajmi 10 MB ni tashkil etadi.

Pochta qutisiga ega bo‘lish uchun ID.UZ tizimidan ro‘yxatdan o‘tish kerak. Bir yildan ortiq vaqt mobaynida foydalanilmagan pochta o‘chirib yuboriladi.

uMail.uz hozricha beta-sinov tizimida ishlamoqda. Pochtaning mobil ko‘rinishi ham mavjud. Xizmatning yana bir qulayligi uning Tas-IX’da joylashganligidir. Shu sababli internetga ADSL texnologiyasi yordamida kiruvchi foydalanuvchilarning traffigi sarflanmaydi.

Pochta ishga tushgan kuni unda 1000 dan ortiq pochta qutilari ochilgan bo‘lib, ayni paytda bu raqam 1500 dan oshib ketdi. Xizmat hozirda rus tilida bo‘lib, uni o‘zbek tiliga tarjima qilish ishlar olib borilyapti.

uMail.uz pochta xizmati O‘zbekiston davlat tizimi xodimlari uchun tavsiya qilinadi. Bundan tashqari biznesmenlar korporativ va oddiy foydalanuvchi sifatida ishlatishlari mumkin.

Ayni vaqtda O‘zbekistonda aksariyat davlat tashkilotlari xodimlari mavjud ish pochta qutilari borligiga qaramay, Mail.Ru kabi chet el bepul pochta xizmatidan foydalanishmoqda. Bunga sabab ularning qulayligidir. Bundan tashqari ularni istalgan joydan turib ishlatish mumkin.

O‘zbekistonda o‘tgan davr mobaynida ko‘plab bepul pochta xizmatlari paydo bo‘ldi va yopildi. Ayni damda ancha vaqtdan beri mavjud bo‘lgan va keng tarqalgan tizim sifatida TPS internet-provayderi tomonidan tashkil etilgan Inbox.uz pochta xizmatini aytish mumkin.

Eslatib o‘tamiz, O‘zbekiston Respublikasi aloqa, axborotlashtirish va telekommunikatsiya texnologiyalari davlat qo‘mitasi qoshidagi Uzinfocom markazi Umail.uz xizmatidan tashqari Gov.uz Hukumat portali, ZiyoNET axborot ta’lim tizimi, WWW.UZ milliy qidiruv xizmati, uForum.uz forum maydoni, E-Kommunal.uz portali, uTube.uz videoportali, ID.UZ tizimi va boshqa servislarni ishlab chiqqan.