Xitoy olimlarining "Lay-Fay” (Li-Fi) yangi texnologiyasidan foydalanish bo‘yicha o‘tkazgan tajribalari muvaffaqiyatli yakunlandi. Ushbu texnologiya internet foydalanuvchilariga yoritish asboblari yordamida tarmoqqa ulanish imkonini beradi. Bu haqda "ITAR-TASS” agentligi Xitoyning "Sinxua” nashri xabariga tayanib ma’lum qildi. Li-Fi’ning radioto‘lqinlar yordamida ishlaydigan "Vay-Fay” (Wi-Fi) simsiz texnologiyasidan farqi shundaki, yangi texnologiya axborotning yorug‘lik nurlanishi yordamida uzatilishiga asoslangan. Buning uchun 1 Vt quvvatga ega oddiy svetodiodli lampaga mikrochiplar o‘rnatiladi va chiroq yoqilganda signal kompyuterga joylashtirilgan qurilmaga uzatiladi. Shu tariqa, tarmoqda doimiy qolish uchun foydalanuvchi chiroqni yoniq holda saqlashi lozim. Yorug‘lik darajasi ahamiyatsiz bo‘lib, aloqa tejamkor rejimdagi xira yorug‘likda ham ishlaydi.
Fudan universiteti axborot texnologiyalari bo‘yicha mutaxassisi professor Chi Nanning ta’kidlashicha, Li-Fi texnologiyasi yordamida ma’lumotlarni sekundiga 150 megabit tezlikda uzatish mumkin. Bu ko‘rsatkich Xitoydagi o‘rtacha internet tezligidan ancha balanddir. "Texnologiya kelajakda tarmoqqa ulanishni sezilarli darajada osonlashtiradi. Buning ustiga, xitoyliklar tejamli svetodiodli lampalardan tobora ko‘proq foydalanmoqda”, — dedi professor.
Foto: © degroupnews.com Manba: Daryo.Uz
| 
