Foto: Gazeta.uz
Ma’lumki, O‘zbekistonda iyul oyining so‘nggi besh kuni davomida yuqori harorat kuzatildi. Kunduzgi havo harorati yilning bu davri uchun xos bo’lgan haroratga nisbatan 4—7 daraja oshmoqda.
"O‘ta issiq ob-havo iyul oyining so‘nggi kunlariga to‘g‘ri keldi. 29—30-iyul kunlari kunduzi havo harorati +40…+42 darajagacha, ba’zi joylarda esa +43…+45 darajagacha ko‘tarildi. Bunday harorat respublikamizda 31-iyulga qadar saqlanib qoladi”, – deb ma‘lumot beradi O‘zgidrometeorologiya xodimi Irina Zaytseva "Gazeta.uz” nashriga.
Irina Zaytsevaning qayd etishicha, bu yil iyul oyi so‘ngida kuzatilgan harorat va issiq ob-havo davomiyligi 2008-yil iyul oyi oxiri va avgust oyi boshida hamda 2011-yil avgust boshida kuzatilgan haroratga yaqin. O‘shanda turg‘un jazirama O‘zbekiston hududida 5—7 kun davomida saqlanib qolgan, havo harorati esa +40…+43 , janubiy hududlarda +44…+45, cho‘l zonalarda +46…+47 darajagacha ko‘tarilgan.
Shuningdek, Toshkentda butun meteorologik kuzatuvlar tarixida mutlaqo yuqori harorat 1997-yil 18-iyulda +44,6 daraja bilan qayd etilgan.
Yozning so‘nggi oyi kirib kelishi bilan issiq havo birmuncha susayadi. 1—2-avgust kunlari kunduzi +37…+42 daraja, keyingi kunlarda esa +35…+40 daraja issiq bo‘ladi.
Manba: www.daryo.uz
| 
